‘nen Aovend vol vastelovendsamusemint es aonluip nao de vastelaovend. Dat is d’n opzat vaan de nuie Mestreechter Revue, ’n initiatief vaan de vastelaovendsvereineginge Tempeleers en Keemeleers en Theater aon ’t Vriethof en geranzjeerd door de Stiechting Revue aon de Maos. Mèt de Revue weurt ’n aw vastelaovendstraditie in iere herstèld. De (door corona 2 jaor oetgestèlde) revue voont plaots op 6 en 7 fibberwarie 2023 in ’t Theater aon ’t Vriethof. ’n Umvangrieke fotoreportaasj is hei te vinde.

Terökkier Mestreechter Revue bringk ‘nen aovend vol mèt vastelaovendsamusemint

De ranzjerende stiechting Revue aon de Maos organiseerde in 2020 ’t lèste “Wiecker Tribbenaol”. Veurzitter Jean Boelen: “Mestreech heet ’n riek verleie es ’t geit um vaan revues en vastelaovendszittinge. Num beveurbeeld de drökbezochde zittinge in de Staarzaol in de jaore zesteg en zeventeg vaan de veuregen iew. Bij versjèllende partije leefde 't idee um dit obbenuits nui leve in te bloze: zoewel bij de Tempeleers es de Keemeleers es de stiechting Revue aon de Maos, en ouch bij d’n theater. Theater aon ’t Vriethof heet de partije same gebrach en zoe is de puzzel gelag.”

Humor

Netuurlek zal humor de bovetoen veure, zeet Tempeleer Jan Janssen, dee zitting heet genome in ’t bestuur. “ Humor is ’n essentieel oonderdeil vaan de Vastelovend, of beter gezag: de basis. Vastelaovend is drei daog laank de zörg aon de kant, meh ouch de maotsjappij en ’t gezag ‘nen humoristische spiegel veurhawwe. V’r zien tot dit e bitteke nao d’n achtergroond is versjove. Mèt oonder mie deze revue wèlle v’r de humor weer get mie nao de väörgroond bringe. En zoe wie z’ch dat huurt is d’r netuurlek ouch meziek en mesjiens ouch nog wel ’n emotioneel memint. De Revue is “veur en door” Mestreech. “ne biezundere aovend vastelaovendsamusemint”, samegevat door Jan Janssen.