Op maondag 6 fibberwarie 2023 waors 't eindelek zoe wied. 'n Oet 2020 stummend initiatief vaan 't Tejater aon 't Vriethof, de Tempeleers en de Keemeleers, leidde nao oetstèl door de coronapandemie, oetindelek tot de lang verwachde première vaan Revue aon de Maos.
Tot d'r mèt väöl nuisjieregheid woort oetgekeke nao 't rizzeltaot vaan dit nui initiatief, bleek wel oet 't feit tot 't Tejater aon 't Vriethof veur zoewel de première es de 2e oetveuring d'n daag daonao stief oetverkoch waore.
Aofgaonde op de reaksies vaan 't pebliek zoewel in de zaol es op de Social Media, mage v'r stèlle tot de Revue 'n sjieke aonvölling kin zien in 't rieke vastelaovends program die us stad al kint.
Oonder de titel " Mestreech, boe is de sjoenen tied nao touw" woort 't pebliek getrakteerd op 'n wervelende show mèt zaank, sketches en akrobatiek. 't Mestreechs Vastelaovends Orkes zörgde veur de muzikaol begeleijing en 't pebliek zong en masse de aw vastelaovendsschlagers mèt, boebei prachtege historische beelde vaan vastelaovend vierend Mestreech waore te bewondere.
De actörs en actrices straolde in 'n groete variatie van hilarische sketches. Ouch de jäog waors vertegenwoordeg door de mètwèrking vaan Dansstudio Maastricht en gamin Levy.
De rezjie waors in han vaan alleskinner Peter Noten, dee zoe kort nao "Lewieke" obbenuits 'nen hit produceerde mèt Revue aon de Maos.
Uiteraard is hei 'n groet woord vaan daank op z'n plaots aon alle sponsors en vrijwèlligers die de Revue meugelek höbbe gemaak.
Veer kieke al oet nao 't vervolg vaan dit spektakel in de aonloup nao de Vastelaovend vaan 2024.
Kiek hei veur 'n oetgebreide fotoreportaasj vaan de Revue.
Hei oonder steit 'n videoregistratie vaan 't openingsnommer "Hiel Gruuts Mestreechteneer te zien"
Mestreechs 
Nederlands