‘nen Aovend vol vastelovendsamusemint es aonlaop nao de vastelaovend. Dat is d’n opzat vaan de nuije Mestreechter Revue, ’n initiatief vaan de vastelaovendsvereiniginge Tempeleers en Keemeleers en ’t Tejater aon ’t Vriethof en geranzjeerd door de Stiechting Revue aon de Maos. Mèt de Revue weurt ’n aw vastelaovendstradisie in iere herstèld. De (door corona 2 jaor oetgestèlde) revue vond plaots op 6 en 7 fibberwarie 2023 in ’t Tejater aon ’t Vriethof. ’n Umvangrieke fotoreportaasj is hei te vinde.

Terökkier Mestreechter Revue bringk ‘nen aovend vol mèt vastelaovendsamusemint

De ranzjerende stiechting Revue aon de Maos organiseerde in 2020 ’t lèste “Wiecker Tribbenaol”. Veurzitter Jean Boelen: “Mestreech heet ’n riek verleije op ’t gebied vaan revues en vastelaovendszittinge. Num beveurbeeld de dròkbezochte zittige in de Staarzaol in de jaore zestig en zeventeig vaan de vierege iew. Bei versjèllende partijje leefde 't idee um dit obbenuits nui leve in te bloze: zoewel bei de Tempeleers es de Keemeleers es de stiechting Revue aon de Maos, even es ’t tejater. ’t Tejater aon ’t Vriethof heet de partijje same gebrach en zoe is de puzzel gelag.”

Humor

Netuurlek zal humor de bovetoen veure, zeet Tempeleer Jan Janssen, dee zitting heet genome in ’t bestuur. “ Humor is ’n essentieel oonderdeil vaan de vastelovend, of beter gezag: de basis. Vastelovend is drei daog laangk de zörg aon de kant, meh ouch de maotsjappij en ’t gezag ‘nen humoristische spiegel veurhawwe. V’r zien tot dit e bitteke nao d’n achtergroond is versjove. Mèt oonder aandere dizze revue wèlle v’r de humor weer get mie nao de veurgroond bringe. En zoe wie z’ch dat huurt is d’r netuurlek ouch meziek en mesjiens ouch nog wel ’n emotioneel memint. De Revue is “veur en door” Mestreech. “ne biezundere aovend vastelaovendsamusemint”, samegevat door Jan Janssen.