‘Dit heet niks um ’t lief’ weurt de titel vaan de nuije Revue aon de Maos

'Dit heet niks um 't lief' weurt de titel vaan de nuije Revue aon de Maos. Op 7 en 8 fibberwarie 2024 vint de twiede edisie vaan dizze Mestreechter Vastelaovendsrevue plaots in 't Tejater aon 't Vriethof.

Aofgeloupe jaor waors 't Tejater veur 't iers decor veur de Revue aon de Maos. Dit carnavaleske spektakelstök woort euveral positief oontvaange in de stad. "Daorum waors d'r ouch geinen inkele twiefel euver 'n twiede edisie", zag Jean Boelen, veurzitter vaan de organiserende stiechting Revue aon de Maos. "Eus intensie waors 'n nuij tradisie neer te zètte die Mestreech opwermp veur de Vastelaovend. Iech dink tot v'r dao in fibberwarie 2023 hiel good in geslaag zien. Mestreech heet weer 'ne revue, wie de stad jaorelaank gehad heet, en dao zien v'r gruuts op."

Regisäör Peter Noten is evels ouch in z'ne sas tot de revue e vervolleg krijg: "Aofgeloupe fibberwarie 'sjöddelde' 't tejater twie aovende laank op häör groondveste vaan 't lache. Dat werkde zier aonstekelek. Mèt de Revue wèlle v'r de bezeukers 'ne carnavaleske lachspiegel veur hawwe. Jummers, de vastelaovend is bei oetstek d'n tied um zakes te relativere en de betrèkkelekheid vaan dinger in te zien. Daan kumpste al hiel gaw tot de conclusie: "Dit heet niks um 't lief". Aanders es d'n titel deit veurkome, heet de nuije Revue wel degelek get um 't lief. 't Weurt 'ne wervelende show vol mèt hilarische sketches, spectaculaire dansnommers en heerleke Mestreechter Vastelaovendsleedsjes."

De kombinasie vaan humor, meziek en dans waors 'n succesvol recep, vertèlt Jean Boelen. "'t Zien ouch aankerpunte in euze Vastelaovend. Mèt daank aon eus sponsore, alle vrijwilligers, de speulers op de buun en neet te vergete 't pebliek in de zaol, höbbe v'r get sjoens neer gezat. Dat wèlle v'r komend jaor evenare".

De kaartverkoup vaan de Revue start op maondag 24 aprèl 2023 um 17:00oor. Kaarte zien te koup via www.theateraanhetvrijthof.nl

De Stiechting Revue aon de Maos steit ouch komend jaor garant veur de organisatie, de rezjie is in han vaan Peter Noten. Revue aon de Maos weurt daobei meugelek gemaak door de Mestreechter Brandslang.